Maitasun kanta bat, Mikel Markez

Ez da erraza kantaldiak (eta oro har, kultura-saioak) antolatzea pandemia-garaian. Baina hor doaz, apurka-apurka. Ezohiko uda honetan (eta ez eguraldiagatik soilik) bitan izan dut Esti eta Mikel Markez entzuteko aukera Uribe Kosta aldean. Horrela segitzen badut jarraitzaile sutsu edo grupi izateko bidean izango nautela ematen dit.

Bi saioak antzekoak izan dira; azken finean, Azal berritzen disko berria izan dute oinarri eta hor, tartekatuta, Mikelen betiko abesti batzuk eta Estiren berriren bat. Eta bisean, honen hit-a, jakina (Oroitzapenek esnatu naute). Sopelan sorpresatxo bat, hala ere: Noka taldeko Andrea Bidart aritu zen kantari. Bietan oso gustura.

Pare bat kontu aipagarri, nire ustez. Arkaitz Miner eta Julen Alonso musikarien lankidetza bikaina (eta bakarrik aritu izan direnetan bi musikariak, jota eta arin-arina jotzen, bitxia eta polita gainera). Bestalde, aita-alabek abestien hitzei ematen dieten garrantzia, sarritan egileak aipatuz: Joseba Sarrionandia, Toti Martinez de Lezea, Alaia Martin, Pako Aristi...

Eta ez da abesti aurkeztua izango, baina Mikelek "Maitasun kanta bat" horren aurkezpena aipatuko dizut. Jon Maiarenak dira hitzak. Mikelen hitzetan, maitasun kanta berri bat idazten denean ordura arte egindako guztien gainean egiten da, geruzak bailiran, edo flysch bat. 

Portzierto: hitz berak erabiliz Garik ere egin zuen abesti bat, beste era batekoa, jakina.

 Entre los conciertos que empiezan a volver al panorama cotidiano, este año he podido escuchar en dos ocasiones a Esti y Mikel Markez en la zona de Uribe Kosta, muy bien acompañados por Julen Alonso y Arkaitz Miner (y en Sopela con otra invitada: Andrea Bidart, del grupo Noka).

Además de las canciones del álbum Azal berritzen, Mikel cantó alguno de sus temas anteriores y Esti avanzó alguno de sus nuevos. A destacar también la importancia que dan a las letras y a citar a autores y autoras de las mismas.

No es una canción presentada como tal, pero Mikel se refirió en Maitasun kanta bat (una canción de amor) a que todas las canciones de amor se construyen sobre las anteriores, como si se tratara de un flysch. Por cierto: la letra es de Jon Maia, y ya la musicó Gari en su día.

 

---

 

Maitasun kanta bat
idazten denean
jartzen dugu beste
guztien gainean

 

Zure bihotzean
nire mingainean
inoren ta denen
pozean, minean

 

Nork esango dizu
altxor bat bezala
gordetzen duzuna
zuretzat ez zala

 

Nik daramadana
zuk daramazuna
kantu ederrenek
duten maitasuna

 

Maitatu ninduzun
maitatu zintudan
izarrak zuretzat
piztu ziren udan

 

Inoiz egin diren
kantu ederrenak
zuretzako ziren
zuretzako denak

 

Maitasun kantu hau
entzuten baduzu
kantu eder denen
gainean jar ezazu

 

Istorio oro
bizi den etxean
nire mingainean
zure bihotzean

 

Eta ni hemen nabil
kantu hau kantatzen
zugana iristeko
nigan arakatzen

 

Hainbeste geltoki
hainbeste itsaso
eta dena esanda
zegoen akaso

 

Maitatu ninduzun…